ബി.എസ്.സി & എം.എസ്.സി ഫിസിഷ്യൻ അസിസ്റ്റന്റ്
എല്ലാ മെഡിക്കൽ സ്പെഷ്യാലിറ്റികളിലും രോഗനിർണയം, ചികിത്സ എന്നിവയിൽ അനുബന്ധ സേവനങ്ങൾ നൽകുന്നതിന് ഔപചാരികമായി പരിശീലനം നേടുന്നവരാണ് ഫിസിഷ്യൻ അസിസ്റ്റന്റുമാർ. ഇവർ മെഡിക്കൽ ഹിസ്റ്ററി എടുക്കുകയും, രോഗികളുടെ പ്രാഥമിക പരിശോധന നടത്തുകയും, ലബോറട്ടറി പരിശോധനകൾക്കും എക്സ്-റേകൾക്കും നിർദേശം നൽകുകയും രോഗനിർണയത്തിനും ചികിത്സയ്ക്കുമായി ഡോക്ടർമാരെ സഹായിക്കുകയും ചെയ്യുന്നു. ഈ കോഴ്സ് പഠിച്ചിറങ്ങുന്നവർക്ക് ഫിസിഷ്യൻ അസിസ്റ്റന്റ് ജോലിക്ക് പുറമേ, മെഡിക്കൽ സോഫ്റ്റ്‌വെയർ സ്ഥാപനങ്ങൾ, ഫാർമസ്യൂട്ടിക്കൽ വ്യവസായ മേഖല, അത്യാധുനിക മെഡിക്കൽ ഉപകരണങ്ങൾ വികസിപ്പിക്കുകയും വിപണനം ചെയ്യുകയും ചെയ്യുന്ന സ്ഥാപനങ്ങൾ, മെഡിക്കൽ ടൂറിസം, മെഡിക്കൽ ഇൻഷുറൻസ് എന്നിവയിൽ വളരെയധികം ജോലി സാധ്യതകളുണ്ട്.
ബി.എസ്.സി & എം.എസ്.സി മെഡിക്കൽ ലബോറട്ടറി ടെക്നോളജി
ക്ലിനിക്കൽ ലബോറട്ടറി ടെസ്റ്റുകൾ ഉപയോഗപ്പെടുത്തിയുള്ള രോഗനിർണയം, ചികിത്സ, പ്രതിരോധം എന്നിവയുമായി ബന്ധപ്പെട്ട ഒരു അലൈഡ് ഹെൽത്ത് സ്പെഷ്യാലിറ്റിയാണ് മെഡിക്കൽ ലബോറട്ടറി ടെക്നോളജി. മെഡിക്കൽ ലബോറട്ടറി പ്രൊഫഷണലുകൾക്ക് ജോലിസാധ്യതകൾ വളരെയേറെയാണ്. ആശുപത്രികൾ, ക്ലിനിക്കുകൾ, നഴ്‌സിംഗ് ഹോമുകൾ, പൊതുജനാരോഗ്യ കേന്ദ്രങ്ങൾ, കൊമേഴ്ഷ്യൽ ലബോറട്ടറികൾ എന്നിവയിലെല്ലാം യോഗ്യരായ ലബോറട്ടറി പ്രൊഫഷണലുകൾക്ക് മികച്ച ജോലിസാധ്യതകളുണ്ട്.
ബി.എസ്.സി & എം.എസ്.സി ന്യൂറോ ഇലക്ട്രോഫിസിയോളജി
വൈദ്യശാസ്ത്രത്തിൽ അതിവേഗം വികസിച്ചുകൊണ്ടിരിക്കുന്ന ഒരു മേഖലയാണ് ന്യൂറോ ടെക്നോളജി. ന്യൂറോ സയൻസസ്, സെല്ലുലാർ എഞ്ചിനീയറിംഗ്, സിഗ്‌നൽ പ്രോസസ്സിംഗ് എന്നിവ ഇതുമായി ബന്ധപ്പെട്ടിരിക്കുന്നു. ഇലക്ട്രോഫിസിയോളജി നടപടിക്രമങ്ങൾ മനസ്സിലാക്കാനും അവ നിർവഹിക്കാനും ഒരു ന്യൂറോ ടെക്നോളജിസ്റ്റിനെ പ്രാപ്തമാക്കുന്ന വിധത്തിലുള്ളതാണ് ഈ കോഴ്സ്. രോഗികളെ വിലയിരുത്തുന്നതിനും വിവിധ ഇലക്ട്രോ ഡയഗ്‌നോസ്റ്റിക് നടപടിക്രമങ്ങൾ ആസൂത്രണം ചെയ്യുന്നതിനും അവ നടപ്പിലാക്കുന്നതിനുമുള്ള പരിശീലനം ഈ കോഴ്സിലൂടെ ലഭിക്കും. സ്ലീപ്പ് സ്റ്റഡീസ്, ഓട്ടോണമിക് ഫംഗ്ഷൻ ടെസ്റ്റുകൾ, അപസ്മാരത്തിന്റെ ശസ്ത്രക്രിയയ്ക്ക് മുമ്പുള്ള വിലയിരുത്തൽ, ഇ.ഇ.ജി നിരീക്ഷണം തുടങ്ങിയവയിലും വിദ്യാർത്ഥികൾക്ക് പരിശീലനം നൽകുന്നു.
ബി.എസ്.സി & എം.എസ്.സി എമർജൻസി മെഡിക്കൽ ടെക്നോളജി
മിക്ക വികസിത രാജ്യങ്ങളിലെയും ആരോഗ്യ പരിരക്ഷാ സംവിധാനത്തിന്റെ നട്ടെല്ലായി മാറിയിരിക്കുന്ന എമർജൻസി മെഡിസിൻ എന്ന ആശയം ഇന്ത്യൻ മെഡിക്കൽ ലോകത്തിന് താരതമ്യേന പുതിയതാണ്. രോഗികളുടെ അസുഖങ്ങളുടെയും പരിക്കുകളുടെയും അടിയന്തരനിർണയവും തുടർ നടപടികളുമാണ് ഇതിൽ പ്രധാനം. ഇത്തരത്തിൽ അടിയന്തരമായി രോഗികളെ കൈകാര്യം ചെയ്യുന്നതിന് ആവശ്യമായ അറിവും കഴിവുകളും അടിസ്ഥാനമാക്കിയുള്ള ഒരു പരിശീലന മേഖലയാണ് എമർജൻസി മെഡിസിൻ. അപകടങ്ങളും പ്രകൃതിദുരന്തങ്ങളും വർധിച്ചുകൊണ്ടിരിക്കുന്ന ഇന്നത്തെ സാഹചര്യത്തിൽ എമർജൻസി മെഡിസിൻ കാലഘട്ടത്തിന്റെ കൂടി ആവശ്യമായി മാറിയിരിക്കുന്നു
എം.എസ്.സി ബയോസ്റ്റാറ്റിസ്റ്റിക്‌സ്
എം.എസ്.സി ക്ലിനിക്കൽ ന്യൂട്രീഷൻ ആൻഡ് ഫുഡ് സയൻസസ്
എം.എസ്.സി ഡെഗ്ലൂട്ടോളജി ആന്റ് സ്വാളോയിങ് ഡിസോർഡർ
ബി.എസ്.സി & എം.എസ്.സി റെസ്പിറേറ്ററി തെറാപ്പി
ബി.എസ്.സി & എം.എസ്.സി കാർഡിയോവാസ്‌കുലർ ടെക്നോളജി
ബി.എസ്.സി & എം.എസ്.സി ഡയബറ്റിസ് സയൻസസ്
ബി.എസ്.സി & എം.എസ്.സി ഡയാലിസിസ് തെറാപ്പി
ബി.എസ്.സി അനസ്തേഷ്യ ടെക്നോളജി
അനസ്തേഷ്യ നൽകുന്നതിനും നിരീക്ഷിക്കുന്നതിനും സഹായിക്കുന്ന ഒരു അലൈഡ് ഹെൽത്ത് കെയർ പ്രൊഫഷണലാണ് അനസ്തേഷ്യ ടെക്‌നോളജിസ്റ്റ്. ഇതിനു പുറമേ അനസ്തേഷ്യ നടപടികൾ, ഉപകരണങ്ങളുടെ സാങ്കേതികവിദ്യ എന്നിവയെക്കുറിച്ച് വിപുലമായ അറിവും ഇവർക്കുണ്ടായിരിക്കും. ആശുപത്രികളിൽ അനസ്തേഷ്യ വിഭാഗത്തിലും ഓപ്പറേഷൻ തിയറ്ററുകളിലും ഉൾപ്പെടെ ക്ലിനിക്കൽ പ്രാക്ടീസ് രംഗത്ത് അനസ്തേഷ്യ ടെക്നോളജിസ്റ്റിന് ഏറെ തൊഴിൽ സാധ്യതകളുണ്ട്.
ബി.എസ്.സി കാർഡിയാക് പെർഫ്യൂഷൻ ടെക്നോളജി
ഹൃദയ ശസ്ത്രക്രിയകളിൽ ഒരു അവിഭാജ്യഘടകമാണ് പെർഫ്യൂഷനിസ്റ്റുകൾ. ശസ്ത്രക്രിയകളിൽ ഉപകരണങ്ങൾ വഴി രോഗിയുടെ രക്തചംക്രമണം നിയന്ത്രിക്കുകയാണ് ക്ലിനിക്കൽ പെർഫ്യൂഷനിസ്റ്റുകളുടെ ജോലി. പ്രൊഫഷണൽ പരിശീലനത്തിനായി കാർഡിയോവാസ്‌കുലാർ പെർഫ്യൂഷൻ വിദ്യാർത്ഥിയെ അക്കാദമികമായും പ്രായോഗികമായും തയ്യാറാക്കുക എന്നതാണ് ബി.എസ്.സി കാർഡിയാക് പെർഫ്യൂഷൻ ടെക്നോളജി കോഴ്സ് കൊണ്ട് ഉദ്ദേശിക്കുന്നത്.
ബി.എസ്.സി എക്കോകാർഡിയോഗ്രാഫി ടെക്നോളജി
ഉയർന്ന ഫ്രീക്വൻസി ശബ്ദതംരംഗങ്ങൾ ഉപയോഗപ്പെടുത്തി മനുഷ്യഹൃദയത്തിന്റെ സൂക്ഷ്മ ചിത്രം പകർത്തിയെടുക്കുകയും ഇതിലൂടെ ആരോഗ്യപ്രശ്നങ്ങൾ തിരിച്ചറിയുകയും ചെയ്യുകയുമാണ് .ഒരു എക്കോകാർഡിയോളജി ടെക്‌നോളജിസ്റ്റിന്റെ ജോലി. അൾട്രാസൗണ്ട് സാങ്കേതികവിദ്യ ഉപയോഗിച്ച് മനുഷ്യഹൃദയത്തിന്റെ അവസ്ഥ മനസ്സിലാക്കുന്നതിനും ഹൃദയം, പെരിഫറൽ രക്തക്കുഴലുകൾ എന്നിവയുമായി ബന്ധപ്പെട്ട പ്രശ്‌നങ്ങൾ കണ്ടെത്തുന്നതിനും ചികിത്സിക്കുന്നതിനും എക്കോ-കാർഡിയോളജി ടെക്‌നോളജിസ്റ്റുകൾ കാർഡിയോളജിസ്റ്റുകളുമായി ചേർന്ന് പ്രവർത്തിക്കുന്നു.
ബിഎസ്.സി മെഡിക്കൽ റേഡിയോളജിക് ടെക്നോളജി
മെഡിക്കൽ ഇമേജിംഗിലും കാൻസർ ചികിത്സയിലും അത്യാധുനിക സാങ്കേതികവിദ്യയുടെ ഉപയോഗം കൈകാര്യം ചെയ്യുന്നതാണ് അലൈഡ് ഹെൽത്ത് സയൻസിന്റെ ഈ ശാഖ. ഇതിന് റേഡിയോളജി, റേഡിയോ തെറാപ്പി & ന്യൂക്ലിയർ മെഡിസിൻ എന്നിങ്ങനെ ഉപ സ്‌പെഷ്യാലിറ്റികൾ ഉണ്ട്. അമൃത ആശുപത്രിയിൽ റേഡിയോളജി & റേഡിയേഷൻ ഓങ്കോളജി വകുപ്പുകൾ സംയുക്തമായി 2005 മുതൽ B.Sc MRT പ്രോഗ്രാം നടത്തിവരുന്നു. വളരെയധികം മികച്ച തൊഴിലവസരങ്ങൾ സൃഷ്ടിക്കപ്പെടുന്ന ഒരു മേഖലയാണ് റേഡിയോളജിക് ടെക്നോളജി. ഈ കോഴ്സ് പൂർത്തിയാക്കിയശേഷം റേഡിയോളജിക്കൽ ടെക്‌നോളജിസ്റ്റ്, റേഡിയോ തെറാപ്പി ടെക്‌നോളജിസ്റ്റ്, ന്യൂക്ലിയർ മെഡിസിൻ ടെക്‌നോളജിസ്റ്റ് തുടങ്ങിയ ജോലികളിൽ സാധ്യതകൾ ഏറെയാണ്.
ബി.എസ്.സി ഒപ്റ്റോമെട്രി
കാഴ്ച സംബന്ധമായ രോഗങ്ങളുടെ നിർണയം, ചികിത്സ എന്നിവ കൈകാര്യം ചെയ്യുന്ന ഒരു ആരോഗ്യ പരിപാലന മേഖലയാണ് ഒപ്റ്റോമെട്രി. ലെൻസുകളും കണ്ണടകളും ഉൾപ്പെടെ കണ്ണിന്റെ കാഴ്ച മെച്ചപ്പെടുത്തുന്നതിനും ഒരു വ്യക്തിക്ക് അനുഭവപ്പെട്ടേക്കാവുന്ന എല്ലാത്തരം കാഴ്ച തടസ്സങ്ങളെയും നീക്കം ചെയ്യുന്നതിനുമുള്ള നേത്ര ഉപകരണങ്ങളെപ്പറ്റിയുള്ള പഠനമാണ് ഇതിൽ പ്രധാനം. ഒപ്റ്റിഷ്യൻ, ഒപ്റ്റോമെട്രിസ്റ്റ്, റിഫ്രാക്ഷനിസ്റ്റ്, ഒഫ്താൽമിക് അസിസ്റ്റന്റ് എന്നീ നിലകളിൽ സേവനം നൽകുന്നതിന് ഒരു വിദ്യാർത്ഥിയെ പ്രാപ്തനാക്കുകയാണ് ബി.എസ്.സി ഒപ്റ്റോമെട്രി കോഴ്സിന്റെ ലക്ഷ്യം.
ബാച്ചിലർ ഇൻ ഓഡിയോളജി ആൻഡ് സ്പീച്ച് ലാംഗ്വേജ് പതോളജി ( ബിഎഎസ്എൽപി)
കേൾവിയും കേൾവി സംബന്ധമായ തകരാറുകളും കൈകാര്യം ചെയ്യുന്ന ശാസ്ത്രശാഖയാണ് ഓഡിയോളജി. സ്പീച്ച് ആൻഡ് ലാംഗ്വേജ് പതോളജി കോഴ്സ് ശബ്ദം, സംസാരം, ഭാഷ എന്നിവയുടെ സാധാരണവും അസാധാരണവുമായ വശങ്ങൾ കൈകാര്യം ചെയ്യുന്നു. സ്പീച്ച് ലാംഗ്വേജ് പതോളജി വിദ്യാർത്ഥികൾക്ക് വിവിധ ശബ്ദവൈകല്യങ്ങൾ, സംസാര വൈകല്യങ്ങൾ എന്നിവ കൈകാര്യം ചെയ്യുന്നതിലാണ് മികച്ച പരിശീലനം നൽകുന്നത്. ഓഡിയോളജിസ്റ്റുകൾക്കും സ്പീച്ച് ലാംഗ്വേജ് പതോളജിസ്റ്റുകൾക്കും ഇന്ത്യയിലും വിദേശത്തും ഇന്ന് തൊഴിൽ അവസരങ്ങൾ ഏറെയാണ്.
0 comments: