തിരുവനന്തപുരം: എസ്.എസ്.എൽ.സി, ഹയർ സെക്കൻഡറി പരീക്ഷ ഉത്തരക്കടലാസ് മൂല്യനിർണയം പൂർത്തിയാകുന്ന ഈ സാഹചര്യത്തിൽ പാഠ്യേതര രംഗങ്ങളിൽ വിദ്യാർഥികൾ പ്രകടിപ്പിച്ച മികവ് വിലയിരുത്തി വിദ്യാർഥികൾക്ക് കൊടുക്കുന്ന ഗ്രേസ് മാർക്ക് വിഷയത്തിൽ സർക്കാർ തീരുമാനം വൈകുന്നു.കഴിഞ്ഞ അധ്യയന വർഷം സ്കൂളുകൾ അടഞ്ഞുകിടന്നതിനാൽ കലാ കായിക മത്സരങ്ങൾ നടക്കാത്തതുകൊണ്ടു മുൻവർഷങ്ങളിൽ സംസ്ഥാനതല മത്സരങ്ങളിൽ പങ്കെടുത്തവർക്ക് ഗ്രേസ് മാർക്ക് നൽകുന്ന കാര്യം സർക്കാർ പരിഗണയിലാണ് .എന്നാൽ സംസ്ഥാന സിലബസിലുള്ള കുട്ടികൾക്ക് ഗ്രേസ് മാർക്ക് നൽകുന്നത് സംബന്ധിച്ച് സി.ബി.എസ്.ഇ സ്കൂൾ മാനേജ്മെൻറ് അസോസിയേഷൻ നൽകിയ പരാതി നിലവിലുണ്ട് .വിഷയം പരിശോധിച്ച് തീരുമാനമെടുക്കാൻ ഫയൽ മുഖ്യമന്ത്രിക്കു വിട്ടിരിക്കുകയാണ് .
തീരുമാനം വൈകുന്നത് എസ്.എസ്.എൽ.സി, പ്ലസ് ടു ഫലപ്രഖ്യാപനത്തെ ബാധിക്കും. ഗ്രേസ് മാർക്ക് നൽകാൻ സർക്കാർ തീരുമാനം വന്നാൽ അതിനായി പല നടപടിക്രമങ്ങൾ ഉണ്ട് .അർഹരായ വിദ്യർത്ഥികളുടെ അടിസ്ഥാന വിവരങ്ങൾ സ്കൂളിൽ നിന്ന് ശേഖരിക്കണം .ഗ്രേസ് മാർക്ക് നൽകുന്ന ബന്ധപ്പെട്ട ഏജൻസികളുമായി ചേർന്ന് രേഖ പരിശോധിച്ചശേഷമേ മാർക്കിന് അർഹത നിശ്ചയിക്കൂ. പിന്നീട് പരീക്ഷ മാർക്കിലേക്ക് ഗ്രേസ് മാർക്ക് ചേർക്കുകയും വേണം. എന്നാൽ ഗ്രേസ് മാർക്ക് എന്ന വിഷയം ഒഴിവാക്കിയാൽ പരീക്ഷ ഫലങ്ങൾ ജൂലൈ മാസത്തിൽ തന്നെ പ്രസിദ്ധീകരിക്കാൻ സാധിക്കും .
സംസ്ഥാന സ്‌കൂള്‍ കലോത്സവം, അറബിക് കലോത്സവം, സംസ്‌കൃതോത്സവം, സ്‌പെഷ്യല്‍ സ്‌കൂള്‍ കലോത്സവം, ശാസ്ത്രമേള, ഗണിതശാസ്ത്രമേള, സാമൂഹിക ശാസ്ത്രമേള, സ്കൗട്സ് ആൻഡ് ഗൈഡ്സ്, ജൂനിയർ റെഡ്ക്രോസ്, ദേശീയ, സംസ്ഥാനബാലശാസ്ത്ര കോൺഗ്രസ്, എൻ.സി.സി, എസ്.പി.സി, സർഗോത്സവം,കായിക മേളകൾ, ലിറ്റിൽ കൈറ്റ്സ് തുടങ്ങിയ വിഭാഗങ്ങളിലാണ് ഗ്രേസ് മാർക്ക് നൽകുന്നത് .ഇത് ഒഴിവാക്കിയാലും പല വിദ്യർത്ഥികൾക്കും തിരിച്ചടിയായി തീരും .
0 comments: