പ്ലസ്‌ടുക്കാർക്ക് കര, നാവിക, വ്യോമ സേനകളിൽ ഓഫിസർമാരാകാൻ എൻ ഡി എ പരീക്ഷ

കര, നാവിക, വ്യോമ സേനകളിൽ കമ്മിഷൻഡ് ഓഫിസർമാരാകാൻ യുപിഎസ്‌സിയുടെ എൻഡിഎ ആൻഡ് എൻഎ പരീക്ഷയിലൂടെ പ്ലസ്ടുക്കാർക്ക് അവസരം. പെൺകുട്ടികൾക്കും അപേക്ഷിക്കാം.

പരീക്ഷ

ദേശീയതല പരീക്ഷ ഏപ്രിൽ 21നു നടത്തും. തിരുവനന്തപുരം, കൊച്ചി, കോഴിക്കോട്, കോയമ്പത്തൂർ, ബംഗളൂരു, ചെന്നൈ,മുംബൈ, ഡൽഹി എന്നിവ പരീക്ഷാകേന്ദ്രങ്ങളിൽപെടും

യോഗ്യത

പ്ലസ്‌ടുവിന് മാത്‌സ്, ഫിസിക്‌സ്, കെമിസ്ട്രി എന്നിവ പഠിച്ചിരിക്കണം.
ജനനത്തീയതി 2005 ജൂലൈ രണ്ടിനു മുൻപോ 2008 ജൂലൈ ഒന്നിനു ശേഷമോ ആവരുത്
മികച്ച ആരോഗ്യവും നിർദിഷ്‌ട ശാരീരിക യോഗ്യതകളും വേണം.

തെരെഞ്ഞെടുപ്പ് രീതി

എഴുത്തുപരീക്ഷയിലെ പ്രകടനം ആധാരമാക്കി അപേക്ഷകരെ റാങ്ക് ചെയ്‌ത് സർവീസസ് സിലക്‌ഷൻ ബോർഡിന്റെ ഇന്റർവ്യൂവിനു ക്ഷണിക്കും. 5 ദിവസത്തോളം നീളുന്ന സമഗ്ര വ്യക്‌തിത്വപരിശോധനയാണിത്.ആദ്യമായി ഇന്റർവ്യൂവിന് ഹാജരാകാൻ യാത്രച്ചെലവു ലഭിക്കും

നേട്ടങ്ങൾ

എൻഡിഎയിലെ പഠനച്ചെലവ് മുഴുവൻ സർക്കാർ വഹിക്കും. ആകെ കൊടുക്കേണ്ടത്, പോക്കറ്റ് അലവൻസടക്കം 35,376 രൂപയും മറ്റു ചെറുതുകകളും മാത്രം.
കേരളീയ വിദ്യാർഥികൾക്ക് കേരള സർക്കാരിന്റെ 2 ലക്ഷം രൂപ സ്കോളർഷിപ് കിട്ടും.
എൻഡിഎ പരിശീലനശേഷം ജവാഹർലാൽ നെഹ്റു സർവകലാശാലയിലെ ബിടെക് / ബിഎസ്‌സി / ബിഎ ബിരുദം ലഭിക്കും. പാസിങ് ഔട്ട് കഴിഞ്ഞ് ആർമി, നേവി, എയർ ഫോഴ്‌സ് വിഭാഗം തിരിച്ച് വിശേഷ ട്രെയിനിങ്ങിന് അയക്കും .ഒരു വർഷത്തിനു ശേഷം സ്‌ഥിരം കമ്മിഷൻ ലഭിക്കും.
നേവൽ അക്കാദമിയിലേക്ക് തിരഞ്ഞെടുക്കപ്പെടുന്നവർക്ക് 4 വർഷം ഏഴിമലയിലെ പരിശീലനത്തിനു ശേഷം ബിടെക് കിട്ടും.

പരീക്ഷ പാറ്റേൺ

പരീക്ഷയിൽ ഒബ്‌ജക്‌ടീവ് ചോദ്യങ്ങളുള്ള 2 പേപ്പറുകൾ. ഓരോന്നും രണ്ടര മണിക്കൂർ. മാത്‌സ് 300 മാർക്ക്,ജനറൽ എബിലിറ്റി 600 മാർക്ക്. തെറ്റിനു മാർക്ക് കുറയ്ക്കും.പരീക്ഷയിൽ മാത്തമാറ്റിക്കൽ ടേബിൾസോ കാൽക്കുലേറ്ററോ അനുവദിക്കില്ല.

അപേക്ഷ രീതി

www.upsconline.nic.in എന്ന വെബ് സൈറ്റിൽ ഒറ്റത്തവണ റജിസ്ട്രേഷൻ (OTR) നടത്തിയിട്ട്, ജനുവരി 9നു വൈകിട്ട് 6 വരെ ഓൺലൈനായി അപേക്ഷ സമർപ്പിക്കാം.ഫീസ് 100 രൂപ എസ്ബിഐ ശാഖ വഴിയോ ഓൺലൈനായോ അടയ്‌ക്കാംwww.upsc.gov.in എന്ന സൈറ്റിലെ Examination – Active Examinations ലിങ്കിൽ വിശദവിവരങ്ങളടങ്ങിയ വിജ്ഞാപനമുണ്ട്. സംശയപരിഹാരത്തിന് ഫോൺ: 011-23385271.