വിദ്യാസമുന്നതി സ്കോളർഷിപ്പ് : അവസാന തീയതി നവംബർ 25 വരെ നീട്ടി

വിദ്യാസമുന്നതി സ്കോളർഷിപ്പ് 2020-21

ഓൺലൈൻ അപേക്ഷകൾ ക്ഷണിക്കുന്ന അവസാന തീയതി നവംബർ 25 വരെ നീട്ടി

കേരളത്തിലെ മുന്നോക്ക സമുദായങ്ങളിൽപ്പെട്ട സാമ്പത്തികമായി പിന്നോക്കം നിൽക്കുന്ന കുടുംബങ്ങളിലെ വിദ്യാർഥികൾക്കാണ് വിദ്യാസമുന്നതി സ്കോളർഷിപ്പ് നൽകപ്പെടുന്നത്.

അപേക്ഷിക്കാനുള്ള യോഗ്യത

കേരളത്തിലെ സ്ഥിരതാമസക്കാരായ, സംവരണേതര വിഭാഗങ്ങളിൽപ്പെട്ടവർ ആയിരിക്കണം അപേക്ഷാർഥികൾ.
അപേക്ഷകരുടെ കുടുംബ വാർഷിക വരുമാനം 2 ലക്ഷം രൂപയിൽ കവിയരുത്.
കേന്ദ്ര/കേരള സർക്കാരുകളുടെ മറ്റിതര സ്കോളർഷിപ്പുകളോ സ്റ്റൈപ്പെന്റുകളോ ലഭിക്കുന്ന വിദ്യാർത്ഥികൾക്ക് ഈ സ്കോളർഷിപ്പിന് അപേക്ഷിക്കാൻ അർഹത ഉണ്ടായിരിക്കില്ല.
ഹയർസെക്കൻഡറി തല വിദ്യാ സമുന്നതി സ്കോളർഷിപ്പ് അപേക്ഷിക്കുന്നവർ സർക്കാർ/ എയ്ഡഡ് സ്ഥാപനങ്ങളിൽ പ്ലസ് വൺ, പ്ലസ് ടു പഠിക്കുന്നവർ ആയിരിക്കണം.

ഹയർസെക്കൻഡറി തല വിദ്യാസമുന്നതി സ്കോളർഷിപ്പിന് അപേക്ഷിക്കുന്നവർക്ക് SSLC/ തത്തുല്യ പരീക്ഷയിൽ B+ ഗ്രേഡ് / 70% മാർക്ക് ഉണ്ടായിരിക്കണം.

സ്കോളർഷിപ്പ് തുക, എണ്ണം

ഹയർസെക്കൻഡറി തല വിദ്യാർഥികൾക്ക് പ്രതിവർഷം 4000/- രൂപ
പ്രതിവർഷം 10,500 ഓളം സ്കോളർഷിപ്പുകൾ നൽകപ്പെടുന്നു.

**അപേക്ഷ സമർപ്പിക്കേണ്ട അവസാന തീയതി- 2020 നവംബർ 25

*www.kswcfc.org എന്ന വെബ്സൈറ്റ് വഴിയാണ് അപേക്ഷ സമർപ്പിക്കേണ്ടത്.

ആവശ്യമുള്ള രേഖകൾ

സ്കൂൾ അധികാരിയുടെ സാക്ഷ്യപത്രം (നിശ്ചിത മാതൃകയിലുള്ളത്). മാതൃക വെബ്സൈറ്റിൽ ലഭ്യമാണ്.
വില്ലേജ് ഓഫീസറിൽ നിന്ന് കൈപ്പറ്റിയ വരുമാന സർട്ടിഫിക്കറ്റ്
ജാതി തെളിയിക്കുന്ന രേഖ/ വില്ലേജ് ഓഫീസറിൽ നിന്ന് കൈപ്പറ്റിയ ജാതി സർട്ടിഫിക്കറ്റ് / SSLC സർട്ടിഫിക്കറ്റിലെ ജാതി രേഖപ്പെടുത്തിയ പേജ്. ( മറ്റു രേഖകൾ സ്വീകാര്യമല്ല)
SSLC /തത്തുല്യ പരീക്ഷയുടെ മാർക്ക് ലിസ്റ്റ്
ബാങ്ക് പാസ്ബുക്കിന്റെ ആദ്യ പേജിൻറെ പകർപ്പ് (അക്കൗണ്ട് നമ്പർ, ബ്രാഞ്ച് കോഡ്, ബ്രാഞ്ച് അഡ്രസ്, IFSC കോഡ് എന്നിവ കൃത്യമായി ഉണ്ടായിരിക്കണം)
ആധാർ കാർഡ്

അപേക്ഷ സമർപ്പിക്കേണ്ട രീതി

www.kswcfc.org എന്ന വെബ്സൈറ്റിലെ " ഡാറ്റാബാങ്കിൽ" ഒറ്റത്തവണ നിർബന്ധ രജിസ്ട്രേഷൻ നടത്തി അപ്രകാരം ലഭിക്കുന്ന രജിസ്റ്റർ നമ്പർ ഉപയോഗിച്ച് വേണം സ്കോളർഷിപ്പിന് അപേക്ഷ സമർപ്പിക്കാൻ.
മുൻവർഷങ്ങളിൽ ഡാറ്റാബാങ്ക് രജിസ്ട്രേഷൻ നടത്തിയിട്ടുള്ളവർ ആണെങ്കിൽ ആ രജിസ്റ്റർ നമ്പർ ഉപയോഗിച്ച് അപേക്ഷ സമർപ്പിക്കണം.
അപേക്ഷ സമർപ്പിക്കുമ്പോൾ അതത് സ്കീമുകൾക്കായി ആവശ്യപ്പെട്ടിട്ടുള്ള രേഖകൾ സ്കാൻ ചെയ്ത് അപ്ലോഡ് ചെയ്യേണ്ടതാണ്.

അപേക്ഷകർക്കുള്ള നിർദ്ദേശങ്ങൾ

അപേക്ഷകരായ വിദ്യാർഥികൾക്ക് സ്വന്തം പേരിൽ നാഷണലൈസ്ഡ്/ ഷെഡ്യൂൾഡ് ബാങ്കുകളിലെ ഏതെങ്കിലും ഒരു ശാഖയിൽ അക്കൗണ്ട് ഉണ്ടായിരിക്കേണ്ടതാണ്.
അപേക്ഷയിൽ രേഖപ്പെടുത്തിയിട്ടുള്ളതും അപേക്ഷകരായ വിദ്യാർത്ഥികളുടെ പേരിൽ ഉള്ളതുമായ ബാങ്ക് അക്കൗണ്ടുകളിലേക്ക് മാത്രമേ പണം ലഭ്യമാക്കുകയുള്ളൂ. ബാങ്ക് വിവരങ്ങൾ രേഖപ്പെടുത്തുന്നതിലെ പിഴവുമൂലം തുക ലഭ്യമാകാൻ ആയാൽ അത് പൂർണ്ണമായും അപേക്ഷാർഥിയുടെ മാത്രം ഉത്തരവാദിത്വം ആയിരിക്കും.
ഓൺലൈൻ അപേക്ഷയിലെ നേരിയ പിഴവുകൾ പോലും അപേക്ഷ നിരസിക്കപ്പെടാൻ കാരണം ആകയാൽ അപേക്ഷാ സമർപ്പണത്തിന് നടപടിക്രമങ്ങൾ വിദ്യാർത്ഥി അതീവ ജാഗ്രതയോടെ പൂർത്തിയാക്കേണ്ടതാണ്.
മറ്റു സ്കോളർഷിപ്പുകളോ സ്റ്റൈപ്പൻഡുകളോ ലഭിക്കുന്ന വിദ്യാർത്ഥികൾക്ക് ഈ സ്കോളർഷിപ്പിന് അപേക്ഷിക്കുവാനുള്ള അർഹതയില്ല ഇത് സംബന്ധിച്ച തെറ്റായ വിവരം അപേക്ഷയിൽ നൽകിയിട്ടുണ്ടെങ്കിൽ അത് തെളിയുന്ന പക്ഷം ലഭ്യമായ തുക 15% കൂട്ടുപലിശയും ചേർത്ത് തിരിച്ചടയ്ക്കേണ്ടിവരുന്നതാണ്. പ്രസ്തുത വിദ്യാർത്ഥി തുടർന്ന് സ്കോളർഷിപ്പിന് അപേക്ഷിക്കാൻ അർഹനല്ലാതായിത്തീരുന്നു.
വെബ്സൈറ്റിൽ ലഭ്യമാക്കിയിട്ടുള്ള മാതൃകയിലുള്ള സർട്ടിഫിക്കറ്റുകൾ മാത്രമേ സ്വീകരിക്കുകയുള്ളൂ.
ഓൺലൈൻ അപേക്ഷ സമർപ്പിച്ചവർ അപേക്ഷയുടെയും രേഖകളുടെയും പകർപ്പുകൾ കേരള സംസ്ഥാന മുന്നോക്ക സമുദായ ക്ഷേമ കോർപ്പറേഷന് തപാലിൽ അയച്ചു കൊടുക്കേണ്ടതില്ല.
സ്കോളർഷിപ്പ് നൽകുന്നത് സംബന്ധിച്ച് അന്തിമതീരുമാനം കോർപ്പറേഷന്റേതായിരിക്കും ഇതുസംബന്ധിച്ച അപ്പീലുകൾ സ്വീകരിക്കുന്നതല്ല.

അപേക്ഷയിലെ തെറ്റുതിരുത്തൽ

അപേക്ഷ സമർപ്പിക്കേണ്ട അവസാന തീയതി വരെ അപേക്ഷയിലെ തെറ്റ് തിരുത്താനുള്ള അവസരവും ഉണ്ടാകുന്നതായിരിക്കും.
പരിശോധനയിൽ തെറ്റായ വിവരം രേഖപ്പെടുത്തിയിട്ടുള്ളതും, അവ്യക്തമായ രേഖകൾ അപ്‌ലോഡ് ചെയ്തിട്ടുള്ളതും, അപൂർണമായതുമായ അപേക്ഷകൾ നിരസിക്കുന്നത് ആയിരിക്കും.

***ഓൺലൈൻ അപേക്ഷ സമർപ്പിക്കേണ്ട അവസാന തീയതി- 25.11.2020